امام عبدالرحمن الباھلی نے، اپنے ایک خطبہ میں، خانگی معاملات میں حد سے زیادہ سیانے پن کا مظاہرہ کرنے، بال کی کھال اتارنے اور شک کے ماحول میں رہنے کے نقصانات کا ذکر کرتے ہوئے ایک واقعہ سنایا:
"میرے ایک دوست نے مجھے بتایا کہ ساحل پر ٹھہر کر غروب آفتاب کا خوبصورت منظر دیکھتے ہوئے اس کے دل میں ایک خیال آیا اور اس نے ایک پریکٹیکل تجربہ کرنے کا ارادہ کیا۔ ڈوبتے سورج سے بنی شفق کی روشنی سے سحر انگیز منظر کی ویڈیو بنائی اور اسی ویڈیو کے درمیان میں اپنی آواز میں پیغام ریکارڈ کرتے ہوئے کہا: میری عالی القدر پیاری بیوی: ان خوبصورت لمحات میں تمہیں یاد کیا، اپنے دل کو تمہارے پیار سے لبریز پایا، اور تم جیسی بیوی کو پانے پر اللہ جل شانہ کا شکر ادا کرتے ہوئے الحمد للہ پڑھا"۔
شیخ الباھلی کے مطابق ان کے اس دوست کی دو بیویاں تھٰیں، اس نے وقت بچانے کے لیے یہ کلپ بیک وقت ہی اپنی دونوں بیویوں کو علیحدہ علیحدہ بھیج دیا۔ اس کا مقصد دونوں کے لیے خوبصورت پیغام دینا اور پیار کے جذبات کا اعادہ کرنا تھا۔
کلپ بھیجتے ہی ایک بیوی کا پیغام ملا کہ اللہ پاک آپ کو سلامت رکھیں، آپ کے چہرے کا نور سلامت رہے، ایمان اور صحت کی سلامتی ملے۔ آمین۔ یاد رکھنے اور بہت ہی پیارا اور خوبصورت کلپ بھیجنے کا بہت بہت شکریہ۔
دوسری بیوی کا بھی اسی لمحے پیغام ملا: یہ کلپ میرے لیے ہی بنایا ہے یا اپنی دوسری چہیتی کے لیے؟ دیکھ لو غلطی سے تو نہیں بھیج دیا مجھے۔
الباھلی کہتے ہیں: اپنے دل پر ہاتھ رکھ کر بتائیے: کس نے اس لمحے کو کیش کرایا ہے اور دل جیتا ہے؟ پہلی نے یا دوسری نے؟ دیکھئے: عائلی اور خانگی زندگی میں زیادہ سیان پتی کو چھوڑیے، اپنی زندگی کو جئیں، مزے کو خراب کرنا بند کیجیے۔ کچھ عورتیں اپنی زندگی کو اپنی ضرورت سے زیادہ دانائی کی وجہ سے برباد کرتی ہیں۔ تغاباؤ: نادان اور جاہل بننے کی کوشش کیا کرو، یاد رکھو کہ نادان کبھی بھی اپنی قوم کا سردار نہیں ہوا کرتا مگر قوم کا سردار وہی ہوتا ہے جو اپنے آپ کو نادان اور ناسمجھ بنا کر رکھتا ہے۔ (لیس الغبی بسید بقومہ، لکن سید القومہ المتغابی)۔ یعنی وہ سب سمجھتا ہے لیکن چشم پوشی کرتا ہے اور معاملات چلنے دیتا ہے۔ اپنے معاملات کو چلتے رہنے دیا کرو، زیادہ چھان بین اور جانچ پڑتال نہ کیا کرو۔
بشکریہ ڈاکٹر عدنان شہدی
0 comments:
ایک تبصرہ شائع کریں