ہر انسان چاہتا ہے وہ دوسروں کو اچھا لگے خوبصورت نظر آئے اور دوسرے اس کی جانب متوجہ ہوں۔۔ اس کے قریب بیٹھنا پسند کریں۔۔ لیکن ہماری اکثریت کو پرسنل ہائی جین کے بارے میں بالکل بھی علم نہیں ہوتا۔
انسانی جسم کے مختلف حصوں سے موسم کے لحاظ سے مختلف قسم کی رطوبتیں خارج ہوتی رہتی ہیں۔ ان کی ایک خاص سمیل ہوتی ہے۔ اگر اپنی صفائی ستھرائی کا خیال نہ رکھا جائے تو ان رطوبتوں کی وجہ سے بہت ناخوشگوار بو جسم سے آنے لگتی ہے جس کی وجہ سے قریب بیٹھنے والے ناگواری محسوس کرنے لگ جاتے ہیں۔
کئی لوگ تو مروت کے مارے اس بو کو برداشت کر لیتے ہیں۔۔کئی کسی بہانے محفل سے اٹھ جاتے ہیں۔ جس بندے سے بو آ رہی ہوتی ہے اسے اس کا احساس نہیں ہوتا کیونکہ ناک کے سونگھنے والے سینسرز اس کے عادی ہو کر اسے فراموش کر چکے ہوتے ہیں۔ کوئی بہت بے تکلف دوست ہو تو شاید ہمت کرکے اس بندے کو اس جانب توجہ دلا دے ورنہ ناراضگی کے ڈر سے کوئی اس پر بات نہیں کرتا۔
ہم نے آج کے بعد اپنا جائزہ خود لینا ہے کہ مجھ سے تو کوئی ایسی بو تو نہیں آ رہی جو دوسروں کو ناگوار گزرتی ہو۔۔ یہ بو دانت برش نہ کرنے کی وجہ سے منہ اور سانس سے بھی آتی ہے۔۔ معدے کی کسی خرابی کی وجہ سے بھی پیدا ہوتی ہے۔
اگر آپ روز نہیں نہاتے تو بھی اس کا شکار ہو سکتے ہیں۔ گرمی کے موسم میں پسینہ بہت آتا ہے اگر کپڑوں کی صفائی کا خیال نہ رکھا جائے اور ایک ہی سوٹ کئی دن پہنا جائے تو پسینے کی بو کپڑوں میں رچ بس جاتی ہے جو بہت بری محسوس ہوتی ہے۔
کئی لوگ دن میں پہنا ہوا سوٹ اسی طرح پہنے ہوئے سو جاتے ہیں اور اگلے روز بھی وہی سوٹ چلا دیتے ہیں۔ مناسب ہو گا اگر کوئی پرانا سوٹ یا شرٹ ٹراوزر نائٹ ڈریس کے طور پر استعمال کر لیں۔۔ اس طرح دن والا سوٹ دو تین روز تک چل جاتا ہے اور زیادہ سمیل بھی پیدا نہیں ہوتی۔
کئی لوگوں کی بغل سے شدید تیز قسم کی سمیل پیدا ہوتی ہے۔ ظاہر ہے یہ اپنے بس کی بات نہیں ہوتی لیکن اسے ختم کرنے کی کوشش کرتے رہنا تو بس میں ہوتا ہے۔۔
روزانہ نہانے کی عادت ڈالیں اس سے طبعیت میں چستی پیدا ہوتی ہے۔ بغل میں کوئی اچھا سا پاوڈر۔ سپرے یا کوئی اور اس قسم کی چیز استعمال کریں۔ کبھی کبھار خود اپنی بغل سونگھ کر چیک کر لیا کریں کہ کوئی بری سمیل تو نہیں آ رہی۔
کسی سے ملنے جانا ہو تو اچھا پرفیوم لگا کر جائیں۔ کئی لوگ بہت تیز سمیل والا عطر یا پرفیوم لگاتے ہیں کہ اس کی سمیل سے ہی قریب والے پریشان ہو جاتے ہیں۔
اچھی سمیل والے پرفیوم کی سلیکشن بھی ایک آرٹ ہے جو ہر کسی کو نہیں آتا۔ سستے اور تیز سمیل والے پرفیوم استعمال کرنے سے گریز کریں۔
میں زیادہ تر یہ پرفیوم استعمال کرتا ہوں اور ان کی سمیل درمیانی اور بہت اچھی لگتی ہے۔
Jaguar for Men
Jaguar Classic
Curve
Polo
جیگوار دو سے تین ہزار کی رینج میں اچھی سمیل والے پرفیومز ہیں۔
کرو (curve) کی خوشبو بہت عمدہ ہے۔۔ پولو مہنگا ہے لیکن سمیل بہت زبردست ہے۔
اس کے علاوہ مختلف باڈی سپرے بھی استعمال کرتا ہوں جو خوشبو کے لحاظ سے تبدیل ہوتے رہتے ہیں۔
عطر میں مجھے اجمل کا مسک سلک بہت پسند ہے۔۔ یہ تقریباً 2500 سے 3000 روپے کی رینج میں فی تولہ مل جاتا ہے۔
تیز سمیل مجھ سے برداشت نہیں ہوتی۔۔ اس لئے ان سے گریز ہی کرتا ہوں۔ کوئی دوست تیز پرفیوم لگا کر ملنے آ جائے تو میرا جیسے دم گھٹنے لگتا ہے۔
اسی طرح کئی لوگوں کے پاؤں میں بھی بدبودار پسینہ آتا ہے اور اگر وہ بند جوتا جرابوں کے ساتھ پہنتے ہوں تو جوتا اتارنے پر ماحول انتہائی ناخوشگوار ہو جاتا ہے۔
ایسے لوگ جن کی جرابوں سے سمیل آتی ہو۔۔اول تو بند جوتا نہ پہنا کریں۔۔ اگر پہننا لازمی ہو تو پاؤں پر استعمال کرنے والی خوشبودار چیزیں بھی مارکیٹ سے مل جاتی ہے وہ لازمی استعمال کریں۔۔ اس کے ساتھ ساتھ جرابیں روزانہ دھلی ہوئی پہنیں۔
جو لوگ سموکر ہیں ان کے سانس سے بھی سیگریٹ کے دھوئیں کی ناخوشگوار بو آتی ہے۔۔ یہاں تک کہ ان کے کپڑے بھی اسی بو سے اٹے پڑے ہوتے ہیں۔ سموکنگ کرنا نہ تو صحت کے لئے اچھا ہے نہ ہی سوشل لائف میں اس سے کوئی فائدہ حاصل ہوتا ہے۔۔ بلکہ الٹا نقصان یہ ہوتا ہے کہ جو لوگ سگریٹ نہیں پیتے وہ آپ سے دور ہو کر بیٹھتے ہیں۔ بہتر تو ہے کہ اس فضول اور صحت برباد کرنے والی عادت سے چھٹکارا حاصل کر لیا جائے۔۔ ورنہ کم از کم سموکنگ کے بعد منہ کی صفائی کا خاص خیال رکھا جائے۔
روز مرہ زندگی میں یہ چند معاملات جو ہمارے اپنے ہی اختیار میں ہوتے ہیں ان پر توجہ دے کر ہم اپنے دوست احباب کو اذیت سے محفوظ بھی رکھ سکتے ہیں اور اس سے اپنی قدرومنزلت بھی بڑھا سکتے ہیں۔
تحریر بشارت حمید
